Li fo risposto et laudato da la Signoria nostra sì in le provision come avisi, et che continui.
     
      Da Modon di sier Anzolo Gradenigo et sier Antonio Bon rectori, di 24 octubrio. Portata per Alvixe Zucarin, con il qual il colegio havia fato un merchado di cavar quel porto, et come ha lavorato assai, è l'opera in bon termine, vien de qui per certe cosse, sia expedito presto per non butar via l'opera.
     
      Di Cypro, di sier Andrea Venier luogotenente et consejeri, date a Nichosia, a dì 1.° octubrio. Come [133] haveano fato la descrition de le vituarie, trovono esser per mexi 9, solicita il mandar il presente a tempo per dar il tributo al soldam.
     
      [1498 11 19]A dì 19 novembrio in colegio non fo il principe, né leto alcuna letera. Vene li orator di Pixa, domandando doy di lhoro, zoè quelli fono a Mantoa, licentia di ritornar a Pixa, lassando qui Lucha de Lanti terzo lhoro collega; et libentissime per la Signoria fo data, et ordinato una lettera confortatoria a quelli citadini, et a le zente d'arme che si provederiano di uno capo et di danari et dil tutto.
     
      Vene sier Antonio Cocho provedador nostro a le cazude, dolendosi di alcune parole ditoli per sier Alexandro Bolani perché voleva vender certo stabele da chà Zorzi a San Fantin. Fo amessa, tamen nulla sequite da poi.
     
      Intrò li cai dil consejo di X dentro, et tuti mandati fuora.
     
      Et da poi disnar in pregadi, fo lete le infrascrite lettere:
     
      Da Ferara dil vicedomino, di 17. Le cosse de lì vano mute et àssi fiorentini esser mal in hordine di provision, Paulo Vitelli esser stato in Fiorenza ebbe alcuni pochi danari, et in quelli zorni esser passà per modenese Filipino dal Fiesco con 200 cavali lizieri, va per il ducha di Milan a Fiorenza.