Et mandano li fanti sono per il [146] paese a Vico, Bientena, Librafata, il bastion di la Verità, la Verucola e Pontadera. Et per la lettera di 14 si dolevano assa' di Marco da Martinengo governador nostro, qual era causa di gran mali; et fo leta questa lettera in colegio, et atento era d'importantia, licet non fusse drezata ai capi dil consejo di X, fo terminà non la lezer in pregadi. Et dato sacramento a tutti.
     
      Da sier Vicenzo Valier pagador, di 12, a mi drizata. Come da dì 10 in qua che hebbeno Calzi, nostri non haveano potuto far nulla; et quel zorno haveano mandato a tuor a Lucha ducati 1500 che la Signoria li mandoe, qualli darano a le zente; atendevano a meter in hordine le artilarie e scalle et machine per tuor qualche imprexa; et il governador, segondo lui, è mal satisfato et publice dice non sperar cossa alcuna da la Signoria, pertanto è malissimo aficionato a tuor niuna imprexa, e saria bisogno o meter presto un altro capo in so luogo, overo con qualche bona parola el fosse placado; et venendo il marchexe di Mantoa se recupereria el contado nostro et etiam havendo danari da dar le page; et la venuta di domino Zuam Paulo Gradenigo electo proveditor sopra i stratioti, perché sì el si comanda cavali 50 apena ne va cavali 10, etc. Poi per l'altra di 14, come haveano inteso la nuova dil marchexe di Mantoa di averne roto la fede, et come de lì era bellissima faxon di campizar et nostri erano quasi signori di la campagna; mancha dar danari a le zente. Item, domino Jacomo Savorgniam sta in extremis per morir.