Da Ferara dil vicedomino, di 21. In la materia di uno contrabando di certe valonie di uno Rombiasio citadino nostro, trovate de lì, qual ha sententiato sia contrabando, et con la Signoria si justificoe.
     
      Da Ravena, di 21. Molti avisi di le cosse dil conte di Sojano, etc.
     
      Da Brexa, di 21. Zercha i pagamenti di provisionati sono in campo di quella comunità, et haver posto bon hordine a le forteze per dubito di Mantoa; voria salnitrio, etc.
     
      Da Corfù, di sier Antonio Moro baylo e capitano e consejeri. Come voriano la Signoria levasse alcuni ordeni fece sier Antonio Grimani procurator quando fue capitano zeneral da mar, che ritorna in danno di quelli.
     
      Da Modom, di sier Nicolò Da cha da Pexaro provedador di l'armada, data a dì 17 octubrio. Avisa il zonzer di le galie di Alexandria e trafego ivi. Dimanda alcuni armizi e cosse bisogna a le galie sotil era con lui; et haver da Syo, da Zuam di Tabia consolo nostro, come el Turco armava per andar a Rodi. Et mandoe uno capitolo di una lettera li havia scrito sier Zuam Viaro retor e proveditor a Nepanto de dì 13 octubrio, come a dì 1.°, uno fratello di Caracassam turco corsaro, con fuste 7, havia preso do nostre nave veniva di Candia con vini, una patrom Alvise Muscatello, l'altra Lucha Premarim.
     
      Da poi disnar, fo colegio per consultar la risposta da far a Ferara, et fo uno cativissimo tempo e gran pioza, pur si riduseno.
     
      [1498 11 24]A dì 24 novembrio in colegio. Vene uno Alvise Signolo sanser, con uno messo di alcuni capetani sguizari, qual portoe lettere latine di essi capetani, et si oferiva di acordarsi et venir a nostro stipendio, [148] facendo guerra al ducha di Milan.