Item, le cosse de lì esser in desordine per la pocha ubidientia sono nei capi, et anche il capitano di le fantarie ne poria haver più, e lui cavalchava con li stratioti. Et quella note partito di la strada che andava a Ligorno, al bastion se ne veneno tutti li stratioti e mai si potè farli ritornar, etc. Sier Piero Duodo sta in leto, non è sinzier di febre; sier Domenego Malipiero vene eri fin in campo e ritornò, et questa note ha habuto un pocheto di febre; domino Jacomo Sovergnam sta malissimo.
     
      Et è da saper, come in la lettera di proveditori, di 17, par haveano tolto ad imprestedo da' citadini da chi 10 et da chi 15 ducati per dar a le zente, perché li danari nostri non erano zonti, et ordinò fusse dato uno carlino per uno, over doi, fino zonzesseno il resto; et che il pagador, a dì 15, partì di Pisa con li stratioti et stete la note fuora, et piantoe l'artilarie al bastion di Stagno, zoè uno cortaldo grosso, do passavolanti grossi, do mezani e alcuni passavolanti, et poi zonte le zente d'arme, volendoli dar la bataja, l'ebeno a pati.
     
      Fono electi per scurtinio in colegio 4 a compir il numero per la lite di brexani, et rimase sier Hironimo Bon, sier Zorzi Pixani dotor e cavalier, sier Marco Dandolo dotor cavalier e sier Michiel Foscari.
     
      Intrò li cai dil consejo di X, et dopo disnar fo consejo di X con zonta, judicio meo per le cosse di [150] domino Marco da Martinengo governador nostro a Pisa, come di lui poi se intenderà.
     
      In quella matina, in quarantia criminal, per el piedar di avogadori di comun, et fo sier Lorenzo di Prioli e compagni, fo preso di retegnir sier Antonio Cocho da Santa Justina, era oficial a le cazude, per haver conzà sul libro di l'oficio, etiam su la bergamena, esser intrà a dì 27, tamen intrò a dì 7, siché azonse 20 zorni, tamen introe in luogo di sier Hironimo Orio che andoe podestà et capitano a Trevixo, et cussì hessendo a Rialto fo fato vegnir a le prexon; li fo dato il colegio et expedito poi.