Di sier Zuam Paulo Gradenigo di 22, da Ravena. Haver ricevuto il comandamento di quel podestà, justa le lettere nostre, di andar a l'impresa di Galiada. Come la matina si dovea partir; ben rechiedeva uno rasonato. Et per collegio li fo scripto iterum, celeremente andasse a dita impresa di Galiada, et in campo sia rasonato Marco di Santi, et Piero Donado citadin da Ravena fazi l'oficio di pagador, fin verà il nostro.
     
      Et in collegio vene Jacomo Sacho, per nome dil conte di Sojano, qual prometeva assa' cosse, tamen voleva qualche zente. Et per collegio, fo terminato darli 200 provisionati et 50 cavali lizieri et la [153] provision di ducati 500 a l'anno in questo interim non cora; et fono facte le lettere e mandati li danari de lì.
     
      Di campo, di proveditori di Bibiena date a dì 20. Come havea ricevuto nostre lettere, et haver inteso li Vitelli esser partiti dil campo di Pisa e andati verso Fiorenza, et che Frachasso non era stà lassà intrar in Arezo, qual veniva contra nostri con 400 cavali. Item, che haveano tolto l'impresa di Galiada, et che le artilarie aspectavano, dovevano esser parte il zorno seguente lì a Bibiena et farìano qualche effecto, et anche zonti sarano li danari se li manda; et haveano terminà non mandar più lettere per la via di Ravena, ma far meter le poste altrove di soto Ravena acciò siano le lettere più preste, et scusavasi, haver scrito ma esser stà retenute sue lettere, etc.
     
      Di li diti proveditori, venute eri nel consejo di X, date a dì 18 a Bibiena. Come haveano terminà con el ducha et condutieri di tuor l'impresa di Galiada; et ha scripto al conte Lamberto di Sojano fazi il tuto et a Ravena mandasse quelle zente a quella via, et domino Polydoro di Tyberti da Cesena et li provisionati, et che arano tuti quelli castelli excepto do, zoè la rocha di Pianeta et Corezano.