Item, reiteroe di haver il salvoconduto per quelli banditi che hessendo qui il conte dimandoe. Li fo risposo non si poter far per esser contra le leze, et le altre lettere si faria.
     
      In questa matina, in colegio, fo balotade do gratie di debitori di la Signoria nostra di poter risponder a li oficii, una di sier Francesco Zigogna venuto proveditor di Cataro, era debitor a le raxon nuove per una piezaria, et l'altra di Francesco Alvise fo patrom di nave che si rupe: et tute do fo prese.
     
      Et da poi disnar, justa il consueto, fo gran consejo.
     
      [1498 11 26]A dì 26 novembrio in collegio. Vene domino Marco Malipiero di Cypro et domino Andrea di Martini prior di Hungaria, tutti do ferieri di Rodi, et presentoe una lettera dil gran maistro di Rodi a la Signoria nostra, data a dì 7 octubrio, per la qual ringratiava la Signoria di le do bombarde haute, che fu fate per Albergeto e Sigismondo in questa terra, et pregava fusse lassato trazer 4 passavolanti, 400 balote di ferro, 50 rotoli di ferro per una caravela, con la qual mandava 80 falconi a donar al re di Franza, al ducha di Savoia et al ducha di Milan; et come si poneva in hordine a Rodi per esser fama l'armada dil Turco dover ussir a tempo nuovo contra Rodi. Et per el principe li fo dito desse in nota quello volea trazer e si faria la lettera.
     
      Da Ravena, di 24. Di alcune aque cressude in le fosse di la terra, qual havia fato grandissimo danno, facea provision di reparar, etc.
     
      Di Rimano, di 23, dal secretario. Come havia nove di campo. Quelli di Popi esser ussiti, e trovono stratioti che havea fato straviza, et fono a le man.