Da Nepanto, di sier Piero Sanudo syndico nostro, di 1.° novembrio. Avisa la morte di sier Zuam Viaro retor e proveditor nostro per causa di fadiche tolte per la fabricha facea far, et far cavar il fosso zà mexi tre, et lo laudoe assai; et come lo arziepiscopo voleva esso synico restasse a governo di quella terra, et non potendo ha lassato sier Hironimo Trum era castelam electo zonto lì, et sier Bernardin Badoer castelam ancora non compiva; solicitava fusse electo il proveditor per esser d'importantia la custodia di quella terra. Et dito sier Hironimo Trum etiam scrisse pregando fusse confirmato; et di oficiali erano col Viaro qual era morto in zorni 7; et cussì fo ordinato a elexer doman a consejo il proveditor, et fu electo sier Zuam Moro, fo proveditor a le biave, q. sier Lazaro.
     
      Di Alexandria, di sier Hironimo Tiepolo consolo, di 15 octubrio. Come a dì 2 di septembrio era zonto lì, et a dì 3 fè l'intrada, andò a visitation dil signor di la terra, e datoli la lettera di credenza recomandò la nation, et lui dimostrò voler tratar ben la nation, e che non si cognosceria diferentia di la nation a soi subditi; poi visitò il castelam di la terra. Et che a dì 12, zonse le galie con la barza patrom sier Daniel Pasqualigo et do galie sotil, et il zorno drio quelle dil trafego, et a dì 24 zonse il merchadante dil Cajaro. Li fo presentà la lettera di la Signoria nostra, e piaceteli assai, et mandò per esso consolo, et volea dar il piper a ducati 90 la sporta: recusono et volendolo tuor a ducati 80, tandem ge lo deteno a ducati 80, et il consolo volse incantarlo ducati 82 et 83 trovoe: non li parse di far, ma lo dete a rata a ducati 78; et ojo fo baratà a cantara 12 per sporta.