Judizio suo, non sarà marzo che si udirà novità, et pose ai franchi, zoè venitiani, zenoesi e catelani, di angaria ducati 24 milia, et tamen al Cajaro fo conza la cossa et li fo ditto: "Signor non far queste novità perché non arai marchadanti, et le tue specie non sarà in quel precio" sichè non seguite. Item, come le specie erano stà pagate molto care; et consegliava fusse provisto che cinque zorni avanti muda non si potesse [172] contratar, zoè da quelli zorni 5 fin al zorno di muda, per li erori seguiva et gran precii si pagava le specie. Et come era stà soto muda; et haver tenuto il conto dil cotimo justamente, et prescrito illico, qual fo mandà a le raxon vechie; laudò li do capitani di le galie; et per il principe fo laudato.
     
      Vene sier Piero Sagredo, venuto capitano di le galie dil trafego, la soa capitanava. Et come a Tripoli non era più per opinion sua a mandar galie nì contar, per esser quella terra fata cativa, et esser trenta fuste di turchi e mori che vano in corso danizando siciliani, et preseno alcuni navilii andava a la spiaza romana, e portano cristiani schiavi vendendoli lì a Tripoli a l'incanto; et esso capitano recuperò 8 candioti presi, quali lavoravano Madone, da dicte fuste con protesti etc. Laudò il mandar quelle galie a do viazi per caxon mori fu con le galie. Tochò zercha il romper da poi muda in Alexandria, et di ritorno sempre è stà in conserva col capitano di Alexandria sier Piero Lando, qual era lì presente, et haver condoto le galie qui. Fo laudato de more.