Item, un'altra lettera data a dì 3 dimandava certi salvi conduti a uno Fioravante da Brexa, et certe altre cosse, maxime a quel ha la intromession di sier Marco Antonio Morexini hessendo avogadori. Li fo risposto per il principe non si poder far etc.
     
      Vene alcuni citadini ambasadori di la comunità di Piove di Sacho, exponendo come l'aqua di la Brenta è per anegar quel loco et andava di sora el ponte di piera et fino al palazo dil podestà qual era quasi in aqua, era sier Zorzi Valaresso podestà; la causa è per il fiumicello nuovo.
     
      Da Padoa ancora si have lettere di 8, di rectori. Come quelli deputati ad utilia erano venuti a dirli tuto el piovà era sotto aqua, processo da la Brenta nuova, rechiedendo fusse provisto. Or consultato in colegio, fo terminato mandar ivi tre inzegneri nostri Coltrin, Bassan et Alexio, a veder di remediar et notifichar dove aveniva.
     
      Et perché l'orator di Monferà era amalato, mandoe a dimandar li fusse mandato uno secretario, il qual fo Alvixe Manenti, et comunicoe alcune cosse, zoè questo:
     
      Avisi di Franza. Come el re a dì 19 di novembrio [193] si parti da Bels(1) per andar in alcuni lochi a la volta di Bertagna. Item, ha mandà uno Gemello, maistro di caxa dil re, in Bergogna da l'archiducha, per caxon che havendo el re di romani tolto uno castello di domino Alberto da la Marchia, el qual domino Alberto ha mandà a desfidar il re di romani, et corso e fato alcune prede a quelli confini, il re li piace et ha mandà a procurar la restitutiom dil castello. Et come l'orator dil re di romani e l'archiducha haveano pregato il re d'Ingaltera rompi guerra al re di Franza, el qual havia risposo non voler romper.