Item, dete:
     
      Lettera dil signor Zuane da Roverè, prefeto et ducha di Sora a lui drizata, data a dì 4 di questo mexe, zoè a esso domino Urbam di Alba orator di Monferà, come havendo fato decapitar a justicia uno suo ribello di la Rocha Vielma in reame, par il re Federico habi retenuti tre di quel loco; per tanto li cometeva nomine suo volesse pregar la Signoria nostra scrivesse over dicesse a l'orator li fazi restituir.
     
      Da Roma di sier Hironimo Donado doctor orator nostro. Fo data una lettera data a dì 27 novembrio manu propria, in risposta di una li fo scrita in favor di Vetor di Zuane, per caxon di certo beneficio, contra domino Felin Sandeo.
     
      In questa matina li consejeri andono a Rialto a incantar le galie dil trafego. La prima have sier Alvixe Marcello q. sier Jacomo per duc. ... la seconda sier Andrea Marzello suo fratello per duc. ... la terza sier Lunardo di Prioli q. sier Agustin, per duc. ... et poi a gran consejo fo fato capitano sier Antonio Diedo fo proveditor sora i oficii.
     
      Da poi disnar fo colegio per consultar la materia di Ferrara.
     
      Di sier Vicenzo Valier, da Pisa di 27 novembrio, a mi drezata et recevuta a dì 8 di questo. Come aspectavano danari perché in effecto quelle zente era in grandissima necessità; et a dì 26 da sera, abuto li proveditori aviso el bastion di la Doloroxa esser abandonato, in quella matina andoe lì et a la Veruchola con domino Filippo Albanese e Sebastian da Moncelese contestabile nostro, et visto dito bastion esser come uno falcom a Buti et Vico, et esser forte per el sito e fabricha, unde saria di opinione quelli fanti sono in Calzi vardaseno ditto bastion, tamen bisogneria conzar li alozamenti che inimici haveano bruzati et ruinato un pocho dil parapeto di sopra, tamen era assa' forte.