Item, vol andar a Velato et vol le zente d'arme vadino a la volta di Ponte di Saresino, sichè sperava quelle cosse passeriano ad vota.
     
      Da Rimano dil secretario, di 10. Come quel conte di Sojano li havia mandato a dimandar vituarie, corzi et 30 lamiere, et come el prosperava in quelle parte.
     
      Da Ravena di 12. Queste nove dil conte di Sojano, et che quella impresa andava bene, né altro da conto.
     
      Da Pisa, avi eri di sier Vicenzo Valier di 23 novembrio. Come inimici haveano cargato le artilarie sue a Vicho, et per Arno le faceano condur verso Fiorenza, et lhoro ancora sono per ritrarsi de lì; et licet queste sia cosse vechie, pur poste.
     
      Di sier Andrea Loredan, capitano di le nave, date a Ruigno a dì 11. Come havia ricevuto lettere nostre di andar a Puola etc. Et che quella sera anderia, dove lassaria Zaneto da Cataro suo armirajo con 37 homeni su la soa barza; ben arricordava fosse provisto a danari per il suo disarmar, et che aspectava con desiderio il proveditor sora l'armar lì; et cussì l'altra barza Pasqualiga etc. Et fo consultato di tuor ducati 4000 da li proveditori in prestedo, per mandar a disarmar ditte do nave.
     
      Da poi disnar con gran pioza fo collegio, et vene Zuam Alberto dicendo l'orator di Milan haverli ditto: esser mandà a spasso, et la Signoria manda zente a Santa Maria di Bagno, e non farà l'acordo. A questo il principe si la rise dicendo quel orator non sapea il tuto.
     
      [1498 12 15]A dì 15 dezembrio in collegio: fo gran pioza non fu il principe. Fo aldido sier Francesco Foscari proveditor a veder le raxon di la Signoria con sier Jacomo Polani, per certa partida di camare di comun, etc.