Item, esser zonto in campo domino Zuam Batista Carazolo foraussito dil reame, al qual il ducha li dà provision ducati 1000 per la sua persona a l'anno, per esser homo di farne conto.
     
      Da Ravena di 14. Mandoe queste lettere abute di campo; et Marco Claudio bombardier esser ivi zonto; li fanti di campo fuzevano e fano la volta di Lugo e Bagnacavalo.
     
      Da poi disnar fu gran consejo, et fui tolto camerlengo a Brexa.
     
      In questa matina vene in colegio sier Domenego Trivixam el cavalier venuto orator di Spagna, et referite succinta la sua legatione. Primo, presentoe una lettera al principe di le majestà di quelli re in spagnolo scrita, la qual è notada di soto. Et come nel suo partir tolse licentia da soe alteze, le qual li disse: "Saluta la illustrissima Signoria de nostra parte et ricomandaci a lei; dilli tre cosse: la prima, siamo per perseverar ne la bona union et benivolentia come ha hauto li nostri avi et padri, et cussì volemo habbi a durar neli nostri posteri, né per niuno ato faziamo, creda quella illustrissima Signoria non siamo per manchar di la bona nostra amicitia; secundo, prega quella Signoria habi per recomandà le cosse dil re Federico di Napoli; tertio, che voglii il resto d'Italia confirmar a se per il ben et quiete d'essa." Poi disse che subito zonto lì esso orator, procurò la trieva zeneral con Spagna e Franza, nominando la liga et praecipue la libertà de Pisa, et a questo quelli re mandò uno suo orator in Franza, ma non potè obtenir, et feno la pace necessitati con re Carlo, et questo per voler dar il juramento a la principessa sua fiola.