Item, che uno turco era con questi, suo amico zà anni 20, li disse: scrivi a la Signoria come il Turco fa una gran armata per passar questo istade in Puja, et io so li secreti di la corte dil Signor, et che dito Signor vol mandar uno homo a la Signoria a dimandar li dagi ajuto in quelle terre latine in Puja, et che havendo danari ogni do mexi, aria aviso di le cosse dil Turco. Et come a la Musachia, vicino a la Vallona, per homeni venuti era aviso si conzava, zoè si tajava legnami 3000 per far fuste et per l'armata, et dice sarà capitano di dita armata Mustafà bei e 'l Signor li dà gianizari 3000, asapi 2000, cavali 5000 et preparava gran armata.
     
      Da Fiorenza di 16, drezata a Piero di Bibiena da un suo amico. Come Gujelmo de' Pazi et Jacomo Nerli erano ritornati in Fiorenza, hessendo stà revocati, qual erano comisari in Casentino, et erano venuti nemici l'uno di l'altro, et quel zorno si erano insieme reconzigliati per mezenità di lhoro seguazi; e rimasto comisario Pier Chorsini con tre altri soto comessarii. Crede che al far di la nova signoria, che dia intrar al primo di genaro, sarà comotione, et crede li farano di la parte fratescha et gran parte di quel governo si mutarà, et voriano che alhora Piero et Juliano si apresentasse in sulle porte perché sarìano introduti. Ozi el grano è cresuto uno carlino il staro; per bisogno di danari hanno preso partito di vender li stabili di le arte et nomina di qual, cossa mai più non fata: ha la merchantia et la seta fratescha, ha molta, et manda uno a Milano dal ducha a protestar non poteno più durar et debi romper guerra a la Signoria che lhoro faranno dal canto suo ogni cossa.