Poi tochoe zercha una lettera fo scrita per li cai di X dil sospeto si havea dil fratello conte Antonio, et che il signor era contento mandarlo qui, la qual lettera [270] quantunque fosse sta ordinato fusse tenuta secreta, l'Alviano la sapè etc. Et per il principe a tutte parte sapientissime fo risposto, et laudando il ducha, et che stesse di bon animo non se li mancheria. Questo orator stete qui tre zorni et si partite.
     
      Vene poi domino Erasmo Brascha milanese va capitano a Trieste per nome dil re di romani; et vene insieme con lo episcopo orator di Milan; contra il qual fono mandati sier Zorzi Pixani dotor, sier Polo Capelo, sier Marco Dandolo doctori cavalieri et sier Antonio Zustignam el dotor, et sentati apresso el principe, presentate lettere di credenza dil ducha di Milan, date a Milan a dì 13 di questo e la mansion diceva: Illustrissimo et excellentissimo tamquam patri nostro carissimo domino Augustino Barbadico Dei gratia duci Venetiarum, qual fu leta, et cussì comenzoe: Serenissimo principe, dovendo andar per nome di la cesarea majestà capitano a Trieste, el mio signor ducha de Milan mi comesse dovesse recomandarlo a vostra sublimità et a questa illustrissima Signoria come fiol, et alegrarsi per suo nome di ogni felicità di questo stato, demum dovessi dir come soa excelentia havia bona volontà et gran ubligation a questo stato, et non era immemore nì sarà mai di beneficii recevudi, et havia dito a l'orator di v. sublimità questo, et fato dir et etiam a missier Domenego Trivixano di questo suo bon animo in adatar le cosse de Italia e trovar modo di questa Pisa etc.