Fo scrito in campo a sier Piero Marcello mandasse il conto di danari dispensadi, et ordinato a Zuam Filippo colateral, era venuto qui, ritornasse a Ravena et mandasse etiam lui li conti; et fo mandato in campo a Bibiena altri ducati ... milia.
     
      [1498 12 29]A dì 29 dezembrio in colegio vene l'orator di Milan, dolendosi che quel domino Erasmo Brascha disse eri parole in colegio che non havia in comission nì dal re di romani nì dal ducha di Milan, et di questo sapeva certissimo; concludendo el suo signor haver bona voluntà, e si 'l si potesse saper il vero si vedria il certo, et di brieve spera la Signoria cognoscerà el bon animo dil signor suo, et che sapendo queste parole havia dito domino Erasmo, soa excelentia lo haverà molto a mal, né li havia dato altra comissione che di ricomandarlo a la Signoria notificando la sua bona voluntà, et che lui da si havia trascorsa la linea. Et il principe li rispose sapientissimamente.
     
      Ancora vene sier Marco Dandolo doctor et cavalier, nepote, et sier Jacomo Soranzo, zenero di sier Lorenzo Zustignam podestà et capitano di Ravena, et refudoe per suo nome la podestaria di Ravena pregando fosse aceptà, et electo in loco suo; et cossì fo stridato et fato el primo consejo, tamen niun non passò, et poi rimase sier Alvise Venier, era stà podestà et capitano a Ruigo, da Santa Lucia, et andoe.
     
      Da Ravena di sier Jacomo Venier proveditor, di 27. Come era venuto lì uno Julio da Rodi capo di squadra dil signor Bortolo d'Alviano con 50 cavali, volea alozamento; et esser una letera dil dito qual non ha hauta; ma inimici haver hauto Val Savignano locho importante.