Et andando i do più vecchi a quelle bande, Idio sa quello de essi seguirà. L'ambasador di Cypro à auto expedition, et doveva partir de zorno in zorno del Cajero, et benché avanti doveria esser posta la morte dil soldà, tamen hessendo questa scrita sarà leta prima.
     
      Et in questo zorno, da poi disnar, domente si legeva le lettere, se reduse el principe con la Signoria, li savii et li cai dil consejo di X in cheba, et consultato il modo di trovar danari per dar li pro e le decime al monte nuovo se diè meter, et terminato far doman consejo di X. Etiam fo parlato in la materia di domino Marqualdo si tratava nel consejo di X; et udito sier Zorzi Pisani dotor, era di pregadi, stato orator al re di romani, el principe se partì et fono electi do savii da terraferma in luogo di sier Hironimo Orio, era andato prima a Bergamo, et di sier Zorzi Corner el kav., havea compido: et rimaseno sier Alvise Venier fo savio da terraferma et sier Paulo Pixani el cavalier fo savio da terraferma, [312] veniva prima di Bergamo, et non era ancor zonto, et tutti do introno.
     
      Ancora fo messo parte di scriver al consolo nostro a Napoli, et fono in opinion tutti tre li ordeni de li savii di collegio, che dovesse far comandamento a la nave, patron sier Sebastiam Marzello, era lì, che debi vegnir a Corfù a requisition di la Signoria nostra et soldo, con conditiom, stagando mexi 6 a' nostri servicii, debi scontar la mità dil debito de li ducati ... li fo prestadi per caxom di dita nave de li danari di la Signoria nostra, come per suo nome li fratelli si havia oferite, et di tuto el consejo fo presa la dita parte et expedite le lettere.