Item, si aspeta a la corte el principe de Orange, e subito che 'l sarà qui el re se partirà et anderà verso Angies et de lì a Nantes dove dia vegnir la reina, et si crede al dito luogo si farano le noze. Et questa lettera è di 21 da Synon.
     
      [1499 01 10]A dì 10 zener in collegio. Vene sier Marco Antonio Donado et sier Marco Antonio Marcello zudexi de piovegi, dolendosi a la Signoria de li avogadori di comun, maxime sier Lorenzo di Prioli et sier Polo Trivixam el cavalier che era ussito, di certo acordo fato soto la toleta con Zuam Filippo Frescobaldi fiorentino fo fratello di Zuam Frescobaldi, andava vestito di cuoro, sta qui et dà a usura a ducati 12 per cento, et havia dati in più tempi a più persone ducati 55 milia et 800 col pegno in man, come apar in lo oficio di l'avogaria per il processo; et che li avogadori li mandò a tuor li libri di caxa et il scrigno di l'aver, e condanato dar lhoro ducati mille, quali tra li avogadori et sier Antonio Calbo noviter intrato si haveano partiti, adeo tochono per uno ducati 106, et di la terza parte dete a la Signoria ducati 300. Or questi piovegi si dolse dicendo per le leze le usure è comesse al suo officio, et per il capitolar si chiama zudexi di le usure e patarini, e li avogadori non dovea tuor el lhoro oficio, et parlò primo sier Marco Antonio Donado piovego: rispose sier Lorenzo de Prioli avogador, poi sier Marin Morexini avochato per li piovegi, et li consejeri si strenseno insieme, et butato uno cao di 40 in luogo di un consejer et mandati tutti fuora di collegio, consultoe la Signoria, tamen non fono d'acordo et rimesso a uno altro zorno, et licet li avogadori havesse il torto, né poteva far da lhoro sententia, tamen non li fo fato contra.