Era pagador Alvise Soranzo fo de sier Remixi, et pagavano sier Francesco Foscarini consejer, sier Zuam Morexini savio dil consejo et sier Marco Zorzi savio a terraferma; etiam era pagati li homeni di le barze. Et vedendo quelli di le galie sotil Veniere venute a disarmar, che lhoro non erano pagati, con gran cridori veneno a la porta di collegio dimandando danari, et fono alcuni chiamati dentro, et per sier Lodovico Loredam procurator savio dil consejo era in setimana fono tasentati, prometendoli il zorno seguente farli pagar, e cussì andono via.
     
      Ancora in questo zorno fo aldito Nicolò Segonti da Cataro scrivan a la camera, venuto qui con lettere di quel rector, per dar certe information di quelle cosse da Cataro: maxime per le saline fo dil Zernovich, et consegliava si dovesse tuorle per la Signoria nostra ad afficto, qual turchi le dariano, et saria gran utelle nostro.
     
      [1499 01 11]A dì 11 zener in collegio non fo il principe per esser gran fredo. Fo aldito sier Moixe Venier oficial a le raxon nuove in contraditorio con li zudexi di proprio sier Piero Bon, sier Hironimo Da Molin e [324] sier Piero Diedo, per la diferentia de chi dia esser oficio di pagar la dota di uno Marioni morto fuora de qui, qual era debitor di la Signoria nostra; et li consejeri non fono d'acordo.
     
      Item, fo fato tre paroni e tre scrivani di le galie dil trafego, zoè balotadi tre tolti per il capitano et tre tolti per li patroni: era uno avogador, e dato sacramento di le piegiarie; queli rimasti fono chiamati dentro juxta il consueto, e tochoe la man a tutti.