Et li fo risposto: a la prima dovesse far ogni cossa contra Forlì; a la seconda di alozamenti si consejeria; e a la terza si faria volentiera.
     
      Vene l'orator di Rimano justificando el signor suo in alcune cosse lì era stà oposto; et disse la cossa di Borso, come scrisse il secretario nostro, et che quel Cesaro Batagin confinato a Ravena facea monede etc.; et in questo zorno esser morto qui in caxa sua domino Malatesta, feva i fati dil signor suo; voria ducati 50 per spexe a sepelirlo; et come questo carlevar esso orator voleva con licentia andar a Rimano; et li fo dati li ducati 50.
     
      Vene uno misier Filippo d'Albi da Brexa per nome di domino Paris da Lodrom, et disse una oration imparà a mente licet volgare, concludendo fusse restituida la provisiom havia da la Signoria nostra ditto domino Paris: et mandato fuori li fo risposto si faria fin do mexi.
     
      Vene uno camerier dil ducha di Milan, chiamato Hironimo Figim, insieme con Bortolo Rozom secretario, di l'orator suo; et presentoe tre bovi a la Signoria nostra juxta il solito, zoè do da parte dil ducha et uno di Maximiano suo fiol conte di Pavia, et presentoe la lettera di credenza dil ducha data adì 25: et poi ditto camerier disse alcune parole, come quel illustrissimo suo signor mandava a la Signoria nostra a donar di fruti di quel pian: e il principe li rispose li aceptava molto volentieri: et ordinato di expedirlo, zoè darli juxta il consueto ducati 150. Et diti bovi era coperti di negro per coroto di la duchessa, tamen fo mal augurio che perse questo anno il stato; et dita carne fo partida tra quelli di collegio, et io era, et ne avi, tra molti officii et secretarii, juxta il consueto.