Da Nepanto di sier Piero Sanudo synico in Levante, di 29 dezembrio. Come veniva a la Signoria nostra domino Nicolò d'Ariano prothoiero de la Morea, per tratar alcune cosse per nome dil Signor turcho, et lo havia pregato scrivesse in recomandation per esser persona da ben; lui, de lì, li ha fato ogni honor etc. El qual prothoiero ozi zonse, et li fo trovato una caxa a San Moisè e conzata per l'oficio di le raxon vechie.
     
      Da poi disnar fo collegio, et sier Antonio Querini q. sier Baldo si oferse far prestar ducati 10 milia de' contanti da alcuni marani erano in questa terra termine un anno al più, havendo perhò caucione di haver li soi danari: et questo partido fo acetado poi, [420] a tempo di far l'armata, come dirò nel successo di questo libro.
     
      Item, fo mandato ducati 8000 a Ravena; con lettere al podestà non li movino, ma diman farassi per collegio pagador in campo, el qual dispenserà diti danari a le nostre zente. Et fo expedito Basilio da la Scuola, et scrito lettere a Padoa, Vicenza e Trevixo li dagino certi cavalli trovati da' villani perché vol condur artilarie su cavalli a la francese, et datoli certi danari è mandato via. Item, expedito Lodovico de Vilmerchà, et scrito una lettera a li proveditori per collegio li dagi conduta di 80 cavalli, et che a quel di Monte Alboto si mandi a far la mostra di fanti 400, et fo a ricordo di sier Marco Zorzi savio a terra ferma, che molto questi do favorizava. Et io per l'ordine nostro expedii molte lettere in Dalmatia, che desseno aviso per tutto di la deliberation presa di armar solum per mexi 6, et esser certi al ritorno haver le soe rifusure, come apar in la parte, et chi voleva andar su galie venisse, et che dovesseno tal nostra diliberation publicar.