Di Ferrara dil ducha, di 7, drizata a Zuam Alberto da la Pigna, qual lui non osava venir in collegio ma la dete a Zacharia et fu leta. Li advisava come era zonto lì Paulo Bilia per nome dil ducha di Milan, per adiutar la praticha di l'acordo di le cosse de Pisa, et per nome dil ducha suo lo havia pregato facesse etc. Sichè volia avisar esso Zuam Alberto di questo, acciò lo dicesse a la Signoria nostra: dicendo si lui è bon per qualcossa, comandi che farà il tutto.
     
      Di Arbe di sier Piero Boldù conte, di 3. Come nel consejo era stà electo soracomito sier Zuam de Dominis q. Crisogono. Et esser nova el ducha Zuam Corvino, fo fiol di re Mathias, el qual era soto la montagna. Et lui conte scrisse dovea andar a danno dil conte Anzolo di Frangipani over sul contà di Zara, a hora avisa esser andato verso Bistroza su quel di Bossina, loco de' turchi, con cavalli 1000 et pedoni.
     
      Da poi disnar, fo domenega di carlevar, non fo collegio et nulla fu fato.
     
      [1499 02 11]A dì 11 fevrer in collegio non fo il principe; fo terminato mandar questa sera ducati 4000 a Ravena. Et era lettere di 8 da Ravena che il conte non era ancor zonto, et havia ricevuto li ducati 8000 per dar in campo col pagador; et haver da Sojano fanti 3000 de' inimici esser stati atorno Pondo, loco dil conte, et li custodi si hano defeso virilmente etc.
     
      [429] Da Pago di sier Jacomo Sagredo conte. Come nel suo consejo haveano electo sopracomito domino Beneto Musolo dotor et cavalier.
     
      Item, fo terminato mandar Baron contestabele a Napoli di Romania, dove era la compagnia con fanti 150, et expediti li 10 bombardieri per Corfù, et mandato 30 cavalli di stratioti, erano su Lio, a Ravena da li altri, a esser col conte di Pitiano.