Item, solicita la venuta dil suo sucessor.
     
      Et in l'altra lettera di hore 5 di note. Come il papa li ha dito haver da Fiorenza di la creation di do oratori et li nominò, tamen fin 17 non erano partiti; et che seguendo acordo li piacerà, et l'orator rispose non saper etc. Et il papa disse: "Credete [472] domine orator son stracho assai". Item, haver da l'episcopo di Concordia orator in Alemagna, come Maximiano è mal contento dil ducha di Milan. Et cussì il cardinal Curzenze eri li ha dito che si strenze la praticha di l'acordo con Franza et la Signoria, et il papa aspeta saper la conclusion di la liga, e aspeta risposta de la Signoria nostra in dita materia, et li disse la nostra Signoria illustrissima non vorà mi meta soto el jogo di Ascanio ch'è inquieto e implacabile. Item, avia mandato 740 fanti spagnoli a Castel Delze drizati al magnifico Piero. Fati e levati di Roma con ducati 680: et di questo à scrito a sier Jacomo Venier proveditor nostro.
     
      Et in questa matina in collegio fo balotadi ducati 800 a sier Polo Capelo el cavalier, va orator a Roma, et ordinato al dito vadi via. Etiam, fo balotà vinti miari di biscoto per mandar a Cataro.
     
      Da Ravena, di 22. Come esso sier Lorenzo Zustiniam è restato lì per expedir li fanti, dimandò cosse di le raxon nuove, tamen, li fo scrito vadi come el puol et è gran fredi. Et avisò da Castel Delze a dì ... Bibiena non teme fino a' 10 di marzo, ànno vituarie. Item, verso Codignola 50 balestrieri ducheschi erano passati; et che lui sier Lorenzo aspetava quello li scriverà il conte di Pitiano.