Marco di Rimano partì per campo, et eri Zuan Mato con bela compagnia e con gran neve. Item, per Traversim corier andava a Roma, li era stà dito a bocha di la liga fata, farà fuoghi etc. Et noto, per inavertentia non li fo scrito, et ozi li fo scrito il tutto.
     
      [1499 02 25]A dì 25 fevrer. In collegio fono aldidi sier Polo Malipiero, sier Bortolo Diedo e sier Alvixe Barbarigo con quelli hanno afito le possessioni dil Polesine, le qual non le vol più tenir etc., nì ha di dar la segurtà come vuol la forma de l'incanto, et nulla fo terminato.
     
      Item, fono alditi li procuratori di la chiesa di San Marcho in contenditorio con li zudexi di procuratori per certa diferentia per il sito di l'abatia di Polichio in bergamasca, la qual teniva olim Jacomo d'Albam che fu morto, et pagava ducati 600 a l'anno a la chiesa di S. Marco.
     
      Item, fono alditi do oratori de la comunità di Vicenza, zoè domino Lunardo da Porto et ... Primo, zercha una caxa di la comunità dove si solea tenir munition, la qual per il capitanio sier Piero Balbi el cavalier era stà data a uno fiol di sier Zuane Balbi. Secundo, a li barcharuoli di quel viazo, che haveano cresuto soldo uno per soma di le frute da esser dato a uno capitano electo a l'isola, di la qual angaria ditti barcaruoli si dolevano etc. Terzio, zercha li portoneri, di le manzarie fanno, et che siano levati. Quarto, li sia dà la regula di l'arsenal per caxun di roveri per l'arsenal, acciò non siegui condanason. Et fono expediti et votà.
     
      Item, fono aldidi li bombardieri, zoè quelli fano artilarie in l'arsenal, sier Alexandro de Leompardis et Sperandio Savello.