Et altri savii, zoè sier Marchio Trivixan, sier Lodovico Loredan procurator savii dil consejo, sier Marco Zorzi, sier Alvise Venier et Alvixe da Molin savii a terra ferma, vol tal revocation, con questo che le barze forestiere anderano a cargar vino in Candia, debino portar lettere di li soi re over [477] consoli nostri che non sono barze di mal affar. Fu contradita per sier Alvise Contarini q. sier Federigo el consejer, era proveditor sopra la camera d'imprestidi, per l'interesse suo, perché havia nave; rispose sier Marco da Molin savio ai ordeni, poi sier Piero da cha da Pexaro cassier, etiam pro interesse, perché havia nave; li rispose sier Polo Barbo el consejer qual era caldo alla revocation, li rispose sier Antonio Grimani procurator; poi sier Marchio Trivixan per la soa opinion; andò le parte, 16 non sincere, 74 di no, quella di do savii di consejo e tre di terra ferma 30, quella di consejeri et dil resto dei savii nel qual ero in opiniom 54, et nulla fu preso. Iterum andoe 22 non sincere, 77 di no, et 80 di la parte di consejo, et non fu preso nulla. Iterum la terza volta andoe: ave 16 non sincere quella consejeri, et 84 di no; la pende, anderà in altro consejo. Et fo ordinato streta credenza di questo per raxon di candioti, et forsi qui soto sarà notade qualche raxon in favor lhoro.
     
      Item, fo messo di scriver a li oratori nostri in Franza per li savii, e datar la lettera a dì 22: come ne era stà dà aviso per il ducha di Ferara volea venir qui per adatar le cose di Pisa con do oratori di fiorentini et uno di Milan, et che debino avisar il re.