Quanto la prima, non parse al collegio perché era stà scripto la venisse a Corfù, et a la seconda fo ordinato si tramasse sotoman et veder si voleseno venderla, ma non volseno, dicendo sono dil re, come dirò.
     
      In questa matina fo retenuto a Rialto sier Alvise Arimondo q. sier Zorzi debitor dil banco di Garzoni, et stè pocho: conzò li fati soi.
     
      Noto. Sier Zacaria Contarini el cavalier comprò la caxa zà un anno di li Redolfi sul canal grando; li costoe ducati 11 milia 370 et li dete stabele a Santa Catarina e danari, et andò a starvi dentro.
     
      Qui comincia il mese di marzo 1499,
      ch'è, secondo Venecia, el primo dì de anno.
     
      [1499 03 01]A dì primo detto. In collegio. Fo alditi li zudexi di piovegi, sier Marco Antonio Donado et sier Marco Antonio Marcello, dolendosi de li avogadori li havia tolto il suo caso di Bortolo Nerli a lhoro aspetante per esser usure; et fo terminà aldirli un'altra volta.
     
      Item, fono alditi li oficiali di le raxon nuove per caxon di debitori sono al suo officio, et li fo comesso facesse pagar.
     
      Item, fono alditi li oratori di Lendenara: si duol di le tanse pagano per il star lì dil conte Alvise Avogaro, et che quelli di Ruigo vien a far alozar lì più quantità, et mostroe lettere di la Signoria 1430 scrite a sier Lazaro Orso era capitanio a Ruigo. Item, non voriano mandar li danari a Ruigo, et voriano che quelli di Ruigo punisse li sciopetieri fuziti etc. Et fono expediti.
     
      Vene l'orator di Napoli, per il qual era stà mandato, et il principe si dolse di Piero Navaro corsaro, homo dil suo re, che havesse preso una nostra nave, et li fo ditto scrivesse di questo al re; et lui si dolse di le extorsion facea il proveditor nostro di Monopoli a molti regnicoli sotto specie di esser marani.