Item, che 'l cardinal Ascanio teniva fermo mai questa liga si [491] concluderà, et il papa voria qualche buso per suo fiol ducha di Valentinoes, et disse questa liga sarà commodo et utilità di la Signoria; et di Fabricio Colona altro non intende.
     
      Dil consolo di Napoli, di 16. Nara il caso dil corsaro Piero Navaro dil haver preso la nave Contarina et brusata in porto di ... El qual corsaro è disperato et è in la Fachignana et ben in hordine, vol far gran danni. Et à preso, è stà ditto, una nave di Alvise Zanzes di botte 500. Item, la nave Marcella a dì 4 era a Palermo, non havia auto l'ordine di la Signoria nostra; ma ben havia inteso de lì dovea andar a Corfù, pur quella note partiva per Chatelogna; et che la nave del Zanzes carga di formenti et formazi andava per Zenoa. Item, esser brusato lì a Napoli il monasterio di monache di San Gregorio et la chiesa. Et che 'l patron di la nave Contarina, vien qui.
     
      Introe li cai di X in collegio; et poi disnar fo consejo di X con zonta di collegio et altri, judicho zercha quello à exposto Piero di Medici che tramava adatamento con Paulo Vitelli etc.
     
      Et tre savii ai ordeni, zoè io Marin Sanudo, sier Marco Molin et sier Vetor Capello; sier Alvise Longo proveditor sora l'armar, et sier Francesco da cha Tajapiera pagador, fossemo mandati a San Zanepolo al bersagio, a far li balestrieri di do galie sotil, sopracomiti sier Marco Contarini et sier Antonio da Canal, et ne missi in mia parte numero 11 di 40 che fo fati, et serviti questi: sier Francesco Zorzi, sier Santo Bragadin, do sier Piero Balbi fo de sier Beneto, sier Bernardin Zustignam, sier Sebastian Loredam, Zuam Piero Stella, Bernardin di Ambrosii, maistro Francesco Barbier et do altri etc.