Copia di capitoli di la liga, trael cristianissimo Ludovico duodecimo
      re di Franza et la Serenissima Signoria di Venezia,
      conclusi a Bles, a dì 9 fevrer 1498.
     
      Cunctis pateat evidenter et sit notum quod ad laudem et gloriam Omnipotentis Salvatoris Domini nostri Jesu Christi exaltationemque et amplificationem totius christianae religionis, honorem et comodum amborum statuum, videlicet excelsi et serenissimi principis domini Lodovici hujus nominis duodecimi Dei gratia francorum regis christianissimi et inclitissimi Venetorum dominii, bona vera secura fidelis atque perpetua pax amicitia foedus et confoederatio omni aevo duratura facta inita ac conclusa extitit et est inter praefatum christianissimum regem suo et successorum suorum nomine parte una, et magnificos et spectatissimos viros dominos Hieronimum Georgium, Nicolaum Michaelem doctorem et Antonium Lauredanum equites oratores nuncios ac procuratores speciales illustrissimi domini Augustini Barbadici ducis atque excellentissimi Venetorum dominii, in hunc qui sequitur modum.
      Primo, quod praefati rex christianissimus et illustrissimus dux pro eis et eorum successoribus regibus francorum et Venetiarum ducibus, atque antedictum excelsum Venetum dominium sunt atque erunt perpetuis temporibus amici et confoederati modo et forma infrascriptis, adversus et contra omnes, nemine excepto praeter romanum pontificem modernum qui, si sibi placuerit, poterit ingredi istud foedus et amicitiam cum ipsis christianissimo rege et illustrissimo duce et dominio Venetiarum.