Item, di 7, come per diverse vie si exclama di questa armata potente fa il Turcho, sarà velle 400, et quel zorno hanno, per messo venuto da Salonichii, come vene lì uno schiavo per conto dil signor a far andar a Costantinopoli tutti i marangoni et calafai, e chi non obediva li sarà forato il naso e strasinati a la porta; et a dì 25 parlò con uno frate, disse zonse uno schiavo per far conto a tutti quelli vuogano remo debino andar a la porta, et cussì a Negroponte et in Casteria con uno altro schiavo, et à visto homeni da remo in gran numero andar verso la porta, et si acelera l'armata, la qual sarà prestissima, si dice per Cypro. Et che quel zorno, a dì 7 marzo, Zuan Casnovadi citadin de lì, li ha ditto esser zonto uno vasilli di la [543] Valona, esser stà mandato hordine a Mustafà Bei fazi conzar et armar de lì l'armata celeremente, et Fait bassà fa far uno grosso schierazzo e do fuste. Et haver da Capigi bassà, ditta armada anderia in Puja a San Cataldo per haver cussì concluso con l'orator di re Fedrico; e che dito re è contento, et il signor Turcho li vol dar altro stado che non li sarà tolto da altri. Item, che 'l fiol dil signor Zuane da Castelnovo bassà è capitano dì l'armada, ch'è gran nimico di la Signoria nostra, et in Sira per do bande una questa di la Valona con parte di quella da Costantinopoli è palandarie, et l'altra poi anderà a Rodi. Item, esso rezimento ha lettere:
     
      Di Napoli di Romania. Come quel rector fa lavorar la terra e ritien li navilii etc. Concludeno quel populo di Corfù è molto sbigotito, e ricordano le provision, vol 2000 spade a farle pagar de lì, et fero, polvere di bombarda, et li contestabili.