Vene misier Zuam Lucha da Pontremolo, per nome dil ducha di Ferrara, et dimandò, atento che domino Cristophoro Alberigo doctor lezeva a Padoa et hora leze a Ferrara, qual era venuto qui col signor, havesse certa lite e fo fato sententia per sier Polo Barbo tunc podestà a Padoa, la qual dia esser menata a la quarantia, prega la Signoria sia prolongato il termine fin al mexe di avosto; et cussì li fu concesso. Poi vene il secretario dil signor e dimandò di certo Bonifacio da la Badia.
     
      Da Castel Delze di proveditori, di 18. Come spagnoli fanno remori; et inimici sono a la Pieve, et a le fantarie danno carlini tre per uno; e il conte Checo è in mala disposition con Paulo Vitelli, era con fanti 220 a Montedoglio; et che essi proveditori haveano terminato far cavalchar ozi li stratioti ai lochi vicini, e non voleno senza danari. Item, esser lì uno messo di Nicolò di Monte Alboto, qual dice esser zonto a far con li fanti, quali non voleno venir avanti senza la paga; et doman si farà la mostra di alemani e spagnoli. Et che la compagnia dil conte havia comenzà a dimandar danari, et già 100 ne erano partiti.
     
      De li ditti, di 19. Come ha di Bibiena di 18 esser gram neve e nulla si pol far. Et li scrive il proveditor di Bibiena pol costizar fino a pasqua. Et il conte di Pitiano abuto lettere dil suo secretario, è qui, come si fa querella di lui che non facea nulla, et si ha dolto con essi proveditori dicendo lui non promesse se non cosse general. Item, dimandano danari per la paga. Et da eri in qua li tempi si conza; et che loro proveditori si haviano excusato col conte dicendo el vulgo diceva, et non la Signoria, di la qual soa eccelentia doveva far fondamento; et che inimici hora declinavano, e saria da far facende.