Ha portato 4 capitoli mandavano quelli di Brandizo a rechiedere per lui; et fono tolti, et dito si vederia. Et fu ordinato li fusse consignà una galia, e balotà 1193 ducati per armarla, e ditto andasse via. Et terminà mandar uno scrivan di l'armamento ivi con li danari per armar la galia; et etiam hora si arma la galia di Caodistria, soracomito domino Caluro doctor.
     
      Item, fo balotà una vesta paonazza, fodrà di dossi, da esser data a Antonio Sandeli da la Porta, et le spexe fate per haver conzà il palazo.
     
      Item, balotà tornesi ducati 250 per mandar a Corfù.
     
      Vene el schiavo del sanzacho di Scutari, et sentò per mezo el principe, vestito con una vesta di veluto biavo, et li tre soi con vesti di pano biavo, et li fo dito per interprete: si manderà Alvise Sagudino poi fata pasqua; et lui presentò un'altra lettera, e disse: sapeva ben chi havea fato danno a le saline etc. Et si parte stasera.
     
      Vene l'orator di Monferà, ed expose alcuni avisi havia dal signor Costantin di le cosse di Franza: et recomandò el conte Zorzi Zernovich; e prima disse di le machination faceva il marchexe di Saluzo contra el signor Costantin di farlo tajar a pezi, el qual havia da li tre stadi esso signor Costantin abuto il contento: zoè da li baroni, clero e populo, che 'l stagi al governo.
     
      Sumario di lettere di Zuanino di Anon al signor Costantino, di 24 fevrer, data a Bles. Come il roy mandò contra li oratori napolitani honoratamente, e li dè audientia in sedia coperta di veluto et razi, et soa majestà sentata, e domino Antonio Trivixan parlò e si alegrò con il re, poi oferse la persona e il reame.