E questo fo essendo cao di X missier Vido Cavatorta, come sa etiam missier Alvise Manenti e altri, ricordi per mi dati in nota, et sono pochi cristiani che a la porta dil Signor turcho possi mostrar la faza, come mi, e che bisognando mi oferisco, e pol far fede missier Piero Malipiero et altri.
     
      Item, aricordo ai bisogni per la propinquità de l'ixola de Candia a la Turchia, se può in 8 zorni armar in Candia galie 30 da homini da remo senza soldo, perché el se atrova su ditta isola da 8 in 9 milia casali, a franchar uno parcho per caxal, armarà le ditte galie 30, le qual per la propinquità ve valerà per 50 de quelle se armano qui per la distantia, et per la reputation quando si armasse galie 30 in Candia, la vose anderia a Costantinopoli le fosseno più de cinquanta.
     
      Item, volendo la Signoria vostra ogni gran quantità di pedoni asprissimi arcieri, per bisogno in Levante e in Italia, quella ne potrà trazer quanti la vorà de dita isola senza alcun soldo, salvo el pan, facendoli franchi come ho ditto a uno parcho per casale.
     
      In merito di questo voria da vostra Signoria do bombarde e una gomena che mi fo tolte per Camalli per servir la vostra Signoria."
     
      [1499 04 02]A dì 2 aprile. In collegio referite sier Polo Pixani el cavalier, come più zovene, quello haviano fato con li compagni dal ducha di Ferrara, et coloquij abuti, quali eri fono da soa excelentia; et che li oratori pixani erano stati lì racomandandosi etc. Et fo ordinato, per collegio, questi tre, iterum ozi, licet sia consejo andaseno.