Zercha le decime di legumi e gotoni. Et haver avisi da Costantinopoli, di l'armata fa il Turcho, e crede ussirà 2 nave et 10 galie, et che fo armà 2 galie et 4 fuste con uno ambasador andava al soldam, et inteso la morte dil soldam l'havia fato sorastar; et Caracassam corsaro era zonto con la nave Permarina presa a Costantinopoli, e uno altro con tre fuste, e il Signor turcho a tutti li dà soldo. Item, di la rota abuti turchi in Polana, et esser stà roti 8 over 10 milia per fredo, et esser venuto ivi uno corier con lettere dil sanzacho, si lamenta di Cataro etc.
     
      Da Mestre di sier Andrea Foscarini podestà e capitano, de ozi. Come era venuto ivi uno sguizaro a far comandamento a' soi, erano lì a Mestre, vadino per alcune sue cosse, e quello volea la Signoria.
     
      Da poi disnar fo collegio, et io andai con li compagni a San Zane Polo al bersajo a far li nobeli di do galie sotil.
     
      Et in questa matina, hessendo il collegio per levarsi, vene lettere di Franza di oratori nostri, date a Bles a dì 25 marzo. Come in quel zorno post missam con son di trombeti, campane e fuogi era stà publichà ivi la liga. Et che 'l matrimonio dil ducha di Valentinoes in la fia di monsignor de Libret seguiva; et il re mandava monsignor di Lion in Bertagna a sigilar li capitoli; et il re li disse che sguizari sono persone 30 milia, et quelli di Berna hanno terminà star uno anno in guerra col re di romani, zoè a spacio a spacio una parte prima, poi li altri; et havea expedito a Lion il mandato di bandizar milanesi e zenoesi, e a quelli hanno salvoconduto darli termine mexi 3, il resto la mità ch'è mexe uno e mezo.