Et che il re ha mandato lanze 100 con il conte di Foys, et lanze 40 soto uno altro condutier. Et altri fino a la summa di 400 di qua da' monti; et vol andar a Lion e menar 300 lanze, e lì farà deliberation dil transito. Item, essi oratori dimandano licentia. Et è da saper, parte di la lettera era in zifra.
     
      Et da poi disnar, reduto in collegio el principe con li consejeri e savij, vene sier Piero Pasqualigo el dotor. Exponendo che uno frate di l'hordine de heremitani, chiamato frate Joane Beneto da Castilione retino, predicator a Santa Maria Formosa, havia posto alcune conclusion le qual eri doveva disputarle; zoè era una conclusion, in pertinentia theologalia sub specie panis et vini totus Christus continetur, et il Corelario dice: haec est falsa prepositio; hoc est enim corpus meum. Item, una conclusion altra: non inconsonum est ergo dicere aliquod false dictum a Christo, et che erano periculose a disputar quasi [573] heretice etc. Per tanto rechiedeva el ditto frate fusse preso; et cussì per 4 consejeri fo ordinato, col favor dil principe, a Zenon capitano, lo retenisse, qual era nel monisterio di San Spirito, et omnino lo havesse in le mano e fusse posto in l'armamento, et fusse examinato dal vicario dil patriarcha; et cussì Zenon lo retene.
     
      Et referite sier Polo Pixani el cavalier, quello haveano facto dal ducha di Ferrara; et che li havia ditto haver disteso la scritura qual la volea mostrar prima; et fo consultato non la veder, nì etiam Zacharia di Freschi non la vedesse; et il ducha havia ditto sabado ch'è a dì 6, vol expedir, e domenega poi partirse, et che havia gran batimento da li oratori de Milan e Fiorenza zercha le forteze.