Item, Scander bassà refudò esser bassà, fo quello corse in Friul, et Sinan bassà è sanzacho di Bossina, Ferisbei è sanzacho di Scutari; chadilescher sono do, uno di la Grecia l'altro di la Natolia, zoè quelli di la fede: hanno de intrata ducati 40 milia, e li bassà solum ne ha 20 milia; deferderi sono li camerlengi, questi etiam vanno a la porta: la qual si fa 4 volte a la setimana di sabado, domenega, luni e marti, e li altri zorni no, et el venere el signor va a la moschea ch'è bellissima de Cristicora. Item, à 8000 gianizari, et sono tre corsari apresso il Signor, Enrichi, Caracassa e Camallì, etiam n'è uno altro Camplici.
     
      In questo pregadi, a dì 9, fo posto parte per i consejeri, cai di XL, savi dil consejo, eceto sier Marchio Trivixam di terraferma, eceto sier Francesco Trum che nulla volse poner, et sier Filippo Trum non era in pregadi per esser morto suo barba, sier [601] Antonio Trum a hora de disnar ozi era vechio: di scriver a li provedadori a Pisa, a Bibiena, a Castel Delze che dovesseno levar le offese e dovesse intimar questo a li capitani fiorentini. Parloe contra sier Marchio Trivixam e messe de indusiar a doman perché Zuam Alberto voleva dar certa scriptura dil ducha questa sera, etiam aspetar sier Filippo Trum. Rispose sier Polo Barbo consejer in piedi a la bancha per esser vice doxe e andò le parte: 2 non sincere, 5 di no, 84 dil Trivixam et 90 dil resto; e poi andò le do opiniom mejo, 2 non sincere, 80 quella di savii, 100 de indusiar, et questa fu presa, et fo dato sacramento per i cai di X a banco a bancho, e poi per il canzelier ordinato gran credenze di la deliberation de indusiar, et di le lettere da Costantinopoli soto pena di l'haver e persona.