El qual primo expose la bona pace ha la Signoria con il Signor et quella voler la Signoria nostra mantenir, et li dete ducati 500 per la pension dil Zante, venitiani, abuti da domino Panthaleo Coresi al qual fece lettere di cambio, et lo havia servito volentiera. Item, dete ducati 1400 per quel almandaro era qui in preson e li bassà li acetò di bon animo, e volse far veder il debito suo qual era ducati 2000: pur restono satisfati e andono dal Signor, e lui orator poi ritornò a caxa.
     
      El ditto, a dì 12. Come vene da lui Alibei turziman e portò li presenti manda a donar il Signor a la Signoria, et che dovesse andar doman da li bassà ad haver risposta e basar la man al Signor, e cussì esso orator andoe vestito con la veste d'oro juxta il solito. E primo andato da li bassà quelli li disseno lo illustrissimo Signor voler la bona paxe purché la Signoria fazi questo medemo, e volerla riformar in scritura e cussì li disse la daria in francho, e l'orator richiese haverla in turchescho. Item, a li confini volea mandar uno suo, et che la Signoria mandasse un altro, e volea saper qual homo, a veder tutti li confini: et sarà da poi expedito il campo che esso signor fa. Item, manda uno schiavo al sanzacho di Bossina acciò l'intendi la refacion di danni fati e vuol el Signor far restituir le anime tolte. Et di la materia di Cataro nulla dicea essi bassà, et l'orator li trete moto, e par el Signor vogli etiam a questo Ferisbei cometer la cossa di Zupa e saline di la villa di Larissa, et a uno altro homo nostro, quali avesseno a judichar, el qual Ferisbei è molto stimato da Mustafà bilarbei di la Grecia e bisogna darli in golla, et far con pochi.