Item, si scriverà a Roma e a Napoli di la sententia fata et manderasse la copia. Or mandate le parte, 21 dil Trum, 168 di altri savii, et fu presa niuna di no e niuna non sincera.
     
      Item, fo posto per ditti savii di dar licentia Antonio Vincivera secretario nostro a Bologna venisse in questa terra: have una non sincera, una di no e tutto il resto dil consejo di la parte; et per el canzelier grando fu exortato tutti di pregadi dovesseno andar a pagar le sue decime, atento li bisogni.
     
     
      [614]Copia di una lettera scrita per el signor soldam
      al rezimento di Cypri.
     
      Sultham et illustrissimo signor, re de' signori et de' arabi, signor elayel custode de pietra, signor pietoso che soccorre forestieri et sue zente, spada del mondo et de la fede, signor dei re et sulthani custode de' Saraceni, signor di due mari, signor dei X signori: che Idio mantegna la sedia dell'illustrissimo signor sulthan orientale et meridiano, spada de fede, Idio mantegna el suo nome e la sua gente.
     
      Nel nome de Dio. El presente scriver a le honorabil man de vui amati et cari Andrea Venier, Bortolo da Pexaro et Ambroso Contarini signori nella cristianitade, et electi ne la fede e signoria, molte salutation di la Signoria nostra. La presente è per avisarvi come è venuto lo ambasador vostro nominato Hironimo Zustiniam a la Signoria nostra, et havemo recevudo de man del dito ambasador do page, di le qual do page ne portò el dito ambasador erano le cosse triste, et li zambeloti tarmadi. Per gran preghiere del caro et amato nostro turciman Tangriverdim havemo tasesto; et cussì volevemo retener lo ambasador vostro per le altre do page, e per gran promesse e preghiere di Tangriverdim che hane promesso in cinque mesi ne le manderete senza alcuno fallo altre due page de bona roba, et zambeloti belli nuovi, et entrò esso Tangriverdim piezo, se passerano li cinque mesi reteniremo el consulo de Damasco et Alexandria et el nostro turciman, et pagaremosse de li ditti.