Et me aricordante fo dato risposta a la lettera, laudando esso conte di tal operation, etiam el conte Zorzi.
     
      Et el capitano zeneral disse in collegio non poteva compir di armar la sua galia che era gran cossa, licet fusse la parte per 6 mexi, e la galia dil zeneral, e fo terminà d'acordo tutto il collegio darli domenega il stendardo, e che le galie altre andaseno a compir di armarse per la Dalmatia, e fo consultato de modo, etc.
     
      Vene sier Sebastian Zustignam nel levar di collegio, exponendo consit fusse stà electo, alias orator al re di romani e comandato si metesse in hordine, unde oltra le altre spexe dete dil suo a' provedidori assa' danari. Item, che havia speso ducati ..., per questo pregava la Signoria li facesse dar: et li fo risposto desse in nota la spesa etc.
     
      Vene sier Vicenzo Barbaro, fratello di sier Jacomo, era castelan dil Scojo di Brandizo, e disse zercha i salli di Brandizo etc.
     
      Da poi disnar fo gran consejo, et fato capitano in Cypro sier Marco Barbo fo consejer, qual refudoe, e poi fu fato sier Troylo Malipiero fo governador de l'intrade q. sier Marin, et aceptoe.
     
     
      [1499 04 24]A dì 24 april. In collegio, prima fo lecto una lettera di misier Urbam di Alba, orator di Monferà, mandava una lettera di misier Marquardo di Brisich data a dì primo di questo a Yspruch che li scrive a lui voglij dir a la Signoria nostra li dagi quello fu promesso a li soi per le investiture abute da Federico terzo Imperator, qual non fu mai li privilegii pagati, perhò lo pregava fusse suo comesso a rechieder questo a la Signoria.