Da Zara, di sier Francesco Venier conte et sier Jacomo da Molin dotor capitano, di 18. Et è da saper sier Francesco Marcelo capitano di Zara, venuto, gionse domenega, tamen non vene a referir in collegio. Or questi rectori di Zara avisa come sier Bernardo da Leze, zenero di madona Dorothea fo moglie dil conte Carlo di Corbavia, voria recuperar uno castello chiamato Elizevam, el qual havia impegnato ad alcuni zentilhomeni nostri fideli di Penchovich; el qual è mia 19 da Zara, 7 da Laurana et 4 dal castel di Nadin, li qual zentilhomeni hanno più di ducati 3000 sotto quel di Zara: per tanto voria hordine da la Signoria di quello havesse a far. Nulla fo risposto.
     
      Da poi disnar el principe con li oratori, per esser la vezilia di San Marco andoe a vesporo, vene le arte a offerir etc. et doman fa pasto justa il consueto; andò in chiesia con le cerimonie, portò la spada sier Zuam Morexini electo ducha di Candia, fo suo compagno ..., et li savii di collegio si redusse per expedir molte cosse: et fo consultato di pagar li spagnoli, è in campo numero 1200, perché li proveditori nostri scriveano stava lì con dubito; tamen fo terminato aspetar altre lettere. Item, consultato di dar licentia a sier Marco Lipomano orator nostro a Milan, tamen niun di savii la sentì se non do savii a terra ferma, fu concluso indusiar; terzo fo consultato di armar le nave, et referite sier Alvise Venier et sier Zorzi Corner el cavalier savii a terra ferma quello haveano operato a pratichar con li patroni, quali dimandavano molto; et visto la poliza di l'armirajo dil porto di la condition et bontà di le nave sono in hordine, et tutti dissono l'opinion sua, nihil [648] conclusum; consultato, me promovente, far li sopracomiti in pregadi per scurtinio, tutto il collegio laudoe tal opinion.