Et fo posto, per li savii dil consejo et di ordeni, una parte, aricordata per sier Marchio Trivixan, che le robe di bazarioti veniva di Constantinopoli et di Puja qui et di fuora dil colfo, dovesse de caetero pagar do et tre per cento; et have tutto il consejo.
     
      Et fo chiamato el consejo di X con la zonta di danari, procuratori et savii, per far l'ubligatiom al Grimani per li ducati 16 milia prestava, ubligarli alcuni depositi dil sal: ita che li harà fino uno anno tutti, et cussì fu fato. Et a hore 21 fo licentiato el pregadi, con gran mormoration di tutti di redursi per niente.
     
     
      [1499 04 27]A dì 27 april. In collegio. Fo el primo zorno si andò di sopra a l'audientia. Vene sier Polo Malipiero, sier Alvise Barbarigo et sier Bortolo Diedo, proveditori sora el Polesene, a dir come havia afitado la possession di la Canda sul Polesene per ducati 2072, preso ducati 200, et dia dar segurtà; la qual si baloterà in collegio; et tolseno licentia etiam di affitar l'altra possession di Pontichio.
     
      Vene domino Aldobrandino di Guidoni dotor orator dil ducha di Ferrara, dicendo presto verà a tuor licentia, aspeta il successor, poi dimandò di certa lite per cossa privata. El principe li rispose si vederia.
     
      Vene l'orator di Urbin, et fè lezer una lettera di 23, dil suo signor, qual voria danari da la Signoria per poter pagar le zente et venir qui, overo una promessa da la Signoria, et tuorli a usura. Risposto si vederà.
     
      Vene il secretario di l'orator di Milan, zercha quella licentia di trazer artilarie da Brexa: li fo risposto, da poi consegliato tra li savii, per il principe: che non volevamo darli per adesso etc.