Item, todeschi esser in gran teror, et che a Bolzan et Inspruch si dava 4 raines per homo al mexe. Item, che do terre franche per division tra lhoro erano state a le man insieme.
     
      Da Brexa, di rectori. Zercha di 200 homeni veniva qui di la riviera di Salò, per montar su le galie et andar in armada.
     
      Di Arbe, di sier Piero Boldù conte, di ... Di alcuni avisi havea, come il re di Hungaria in uno lhoco ditto Arcaspogi facea zente contro turchi, Item, el ducha Corvino haver tolto uno castello chiamato Parlera, fo di uno che stava col padre, nel prender dil qual havia auto gran thesoro tra danari, arzenti etc., forsi da ducati 400 milia.
     
      Da Nepanto di sier Piero Sanudo synico, di 25 fevrer. In materia di sali di Corfù; et par habi intromesso sier Zuam Nadal Salomon fo capitano dil borgo di Corfù etc.
     
      Vene Jacomo da Tarsia in collegio, qual disse, dovendo andar in Cypro, era contento, et vuol provisionati, et non fanti da sguazo, vol danari, vol 20 zorni per andar fino a Brexa. Or mandato fuori fo consultato: sier Nicolò Foscarini savio dil consejo vol dar li fanti et non provisionati, perché tutto è uno et è sparagno di la Signoria a far fanti a li qual si dà ducati 30 al mexe, et a li provisionati ducati 3 al mexe, et si altri era d'opiniom contraria voleva el pregadi; et chiamato dentro li fo oferto 300 page et a Zanon da Colorgno 150, et lui recusò dicendo non voler ir per niente.
     
      In questa matina sier Vetor Capello savio ai ordeni, aricordò una provision di haver danari, zoè vender li danari di zudei, et ducati 3000 de li zudei di Mestre, che fono venduti a tempo di la guerra di Ferrara a 10 per cento, retuorli in driedo et revenderli etc.