Item, lui provedador à fata la via di Pontremolo et Parma per venir per la più curta, et si levò eri da Pisa a hore 14.
     
      Di sier Vicenzo Valier provedador di stratioti di 25, da Petrasanta. Di l'aversi levato con li stratioti et zente d'arme da Pisa, quali alozavano fuori di la terra, et tutta via vieneno via: voria alozamenti per li stratioti, perhò la Signoria ordini.
     
      Da Chioza, di sier Zorzi Pixani dotor et cavalier podestà. Come voria danari per la spexa si farà nel passar di le zente vien di Romagna. Et li fo scrito tolesse di danari di le decime si scude de lì
     
      Da Treviso, di sier Andrea Dandolo podestà et capitano. Zercha 50 cavalli fo tolti di quel teritorio per Basilio da la Scuola: per tanto al presente quelli de chi sono, lì ha richiesti, prega la Signoria fazi restituirli.
     
      Noto. Come Antonio Vincivera secretario stato a Bologna, licet non habi referito, pur disse havia ducati 450 ch'è era el resto di danari li avanzò de li provisionati fece, et li dete a li camerlenghi, et disse ancora ne era de più, ma havia tolti per farsi le spexe etc.
     
      Da poi disnar fo gran consejo, et fu fato 4 soracomiti, zoè sier Polo Valaresso fo patrom di la barza armada q. sier Cabriel, sier Lorenzo Loredam fo soracomito q. Polo, sier Marco Tiepolo fo patrom in Barbaria de sier Matio, et sier Tomà Marin ch'era judexe de' procuradori; et l'altro non passò.
     
      [668] E fo posto parte per li consejeri di cazar a uno a uno li parenti, quando si ballottava ditti soracomiti, et have 14 non sincere, 142 di no, 650 di la parte et fu presa.