Item, Perosa non li volse dar il passo per causa dil papa che non volse, e capitoli haveano con fiorentini; et Piero di Medici a dì 15 septembre zonse in campo. Et poi veneno in Val di Lamon a Maradi, demum in Casentino e stete obsesso in Bibiena etc. Laudò il ducha di Urbim, et domino Zuam Batista Carazolo; et che 'l signor Bortolo da Alviano à gran cuor, et il signor Carlo Orsino è bon [672] soldato. Item, Lodovico di Vilmerchà da Crema, et Hironimo Sumarippa da Verona, et Lazaro Grasso laudoe; poi disse di contestabeli quali sono merchadanti; pur laudò Jacomin di Val Trompia e Pim da Bergamo; biasmò Perim di Luppi; quanto ai stratioti disse esser mal serviti, tristi, et la più parte famegii, meglio saria haver pochi et boni. Item, laudò el provedidor Venier qual à bona fama con soldati; etiam laudò li secretarii, et Marco di Santi era stà operato, qual era suo secretario, et Alvixe di Piero secretario dil provedidor Venier. Di danari nulla disse. Et venuto zo di renga, sier Marco Antonio Morexini el cavalier consejer, licet fusse di zoveni, per non esser il principe, di hordine di altri consejeri lo laudò: fo longo et ben.
     
      Item, fo posto parte, per tutte tre man di savii, di scriver al capitano di le galie di Barbaria, qual era in Istria, et non lo trovando si spazi a Saragoza, che vadi a Corfù ad aspectar hordine dil zeneral. Have 10 di no e tutto il collegio di la parte, e fu presa, et di questa tal deliberation fo ordinato stretissima credenza.
     
      Item, fu messo per sier Ferigo Corner procurator, sier Constantin di Priuli, sier Marchio Trivixan, sier Filippo Trum procurator e sier Nicolò Foscarini savii dil consejo, di tuor do nave, zoè quella di sier Beneto Zustignan e quella di sier Alvixe Malipiero q. sier Stefano procurator, quali voleno con 100 homini ducati 500 al mexe, e perhò siano tolte e mandate in armada, non obstante la parte presa.