Item, avisa dil rompersi di la nave patron Pasqual Vidal, zoè Veniera, participi sier Polo Loredan e sier Marco Querini, sora le saline: è stà recuperà solamente li gropi d'oro e d'arzento.
     
      Da Brexa, di rectori, di 3. Come haveano ricevuto la lettera dil cassar di domino Marco da Martinengo de li stipendii nostri, nel consejo di X, e li lievi le tanxe; et cussì hanno facto.
     
      Da Padoa, di sier Luca Zen capitano, di 5. Haver fato le mostre a li stratioti, sono 196, mancha cavali 26, juxta i mandati. Item, un'altra in recomandation di Zorzi Servo capo di stratioti.
     
      Vene sier Alvise Pasqualigo, dicendo à lettere di suo fradello sier Francesco, di Ancona, che arma la sua galia, et esser homini ivi di armar; et sier Nicolò Tajapiera soracomito, che tutavia qui armava, ha solum 17 homeni da remo, siché non si pol levar; et fo [686] ordinà resti fino verano li homini vien di veronese che ne torà parte.
     
      Et fu parlato di danari, e leto la parte di sier Polo Barbo, et sier Nicolò Foscarini vol cassar don Ferante, Bajoni, Bologna e Urbim.
     
      Da poi disnar fo pregadi, et vene le infrascripte lettere. Et prima da Roma di l'orator di 3: come era stato dal papa a dimandar la bolla di la confirmation dil Perdom di la Sensa consueto a San Marco, et soa Santità ge lo concesse, tandem metendolo in gran servicio; et sa che il cardinal di Siena con do altri cardinali volevano haver quello di Sant'Antonio di Padoa e non l'hano potuto haver; et manda la bolla la copia di la qual sarà qui sotto posta. Poi il papa dimandò di la grande armata facea la Signoria nostra, e l'orator li disse lo sapea per lettere particular, et il papa disse el Turco rompe adoncha la pace, et esso orator rispose di no, ma per star risguardosi quella feva armata.