Vene li provedadori sora la sanità, dicendo stratioti vien di Pisa di loco amorbato et non dieno venir qui, unde fo scritto non venisseno in questa terra ma stesse aspetar ordine, et il capitano di Padoa scrisse zercha li alozamenti de' ditti stratioti et che a Moncelese era Zuam Paleologo.
     
      Da Treviso. Dil zonzer di stratioti. Et vol andar per veder le aque, voria uno inzegner apresso di lui: et per la Signoria fo ordinato a Marco Alexio ingegner vi andasse.
     
      Da Puola, di sier Bortolo Calbo, conte. Come la barza si lavorava et era stà messa a charena et era stà trovà mior di quello si pensava, et per tutto zugno sarà in hordine. Item, mandò nuove abute da uno frate di San Francesco, vien da Ragusi. Et primo di l'armata turchescha, et che è capitano Achmat bei zenero dil Turcho, dice el numero di le velle, fa aparato di exercito per terra, el Signor vien in persona, et Mustafà bei sanzacho di la Vallona et Feris bei sanzacho di Scutari à fato far ponti per le fiumare di l'Albania, et in Bossina era venuto Scander bassà sanzacho, fo quello corse in Friul. Item, havia fato comandamento niun non coresse su quel di l'Hungaro, et che a Vallona erano navilii in hordine, et l'armirajo a uno bosco apresso el Butrinto con 700 homini è stato do mexi a tagiar legnami per l'armata; et che apresso Corfù era reduto exercito, dicono a danni de' zimarioti; et quel [691] frate adiposo di sua man, vien de qui a la cha mazor, tamen pocha stima fu fato.
     
      In questa matina li consejeri andono a Rialto a incantar la galia di sier Cabriel Soranzo di Aque morte, che non si poteva provar, et non trovoe patrom.