Ho scritto largamente perché questa lettera va per mar: e non credete che mai, per via di terra, vi dica cossa alcuna.
     
      In questo pregadi, a dì 10 mazo, fu fato il scrutinio per via di boletini di tre provedadori sora le exation di danari, et fono tolti tutti di collegio, savii di consejo et terra ferma, et consejeri, et zercha 4 altri, tra li qual sier Galeazo Simitecolo; et perché quelli di collegio non potevano esser balotadi fu fato un'altro scrutinio. Quelli fono tolti sarano qui.
     
      Electi provedadori sora le exation di danari.
     
      † Sier Domenego Marin fo capitano a Padoa, q. sier Carlo 144
      † Sier Luca Pixani fo consejer, q. sier Zuam 130
      Sier Nadal Nadal è di pregadi, q. sier Zuane -
      Sier Anzolo Trivixan fo patron a l'arsenal, q. sier Polo 91
      † Sier Antonio Valier fo consejer, q. sier Otaviam 136
      Sier Alvixe da Molin fo cao dil consejo di X, q. sier Nicolò 88
      Sier Zuam Suriam fo provedador al sal, q. sier Antonio -
      Sier Zacharia Contarini el cavalier, è di la zonta, q. sier Francesco dotor -
     
     
      [1499 05 11]A dì 11 mazo. In collegio. Se ave lettere da Verona di la morte di sier Andrea da Leze capitano; de lì restò aduncha sier Jacomo Lion podestà et vice capitano; et in loco suo fu facto sier Hironimo da cha da Pexaro fo capitano in Candia, q. sier Lucha procurador, qual andoe.
     
      Vene li tre provedadori electi sora la exation di danari, si volseno scusar con desordine, pur persuasi acetono.
     
      Vene li oratori fiorentini; exponendo haver da lhoro signori come ringraciavano la Signoria nostra di haver fato levar le zente di Pisa, et comunichava lhoro haver dato termine 6 zorni a' pisani li dichino il voler lhoro.