Da Bergamo, di sier Hironimo Orio et sier Antonio Bernardo dotor et cavalier rectori. Come haveano auto lettere da misier Zuam Jacomo di Triulzi, di haver il transito di do cavalli carghi d'arme, et cussì li haveano concesso licentia.
     
      Da Monopoli di sier Thomà Lion provedador, di primo. Come zonse la galia de lì col soracomito qual messe banco, et quel zorno trovoe 40 homini, et la expedirà presto, Item, havia ricevuto una nostra lettera in conforto di populi: qual leta tutti cridoe: Marco, Marco. Item, ricevete un'altra lettera zercha i biscoti, dice si faria 10 in 15 tumani al zorno, et costeria pizoli 17 il tumano la spexa, qual val pizoli 28, ma non era grani, et bisogneria tuorli a Trani, poi non era navilii per mandarli in armada. Item, lui fortificava la terra da la parte dil mar: ben era vero che do chiesie, zoè San Francesco et San Domenego, al bisogno saria bon butarle zoso.
     
      Da Padoa, di sier Lucha Zen capitano. Zercha mostre fate de stratioti, et haver cernito li boni et li cativi in execution di nostre lettere.
     
      Da poi disnar fo gran consejo; et fato capitano a Verona, niun non passò.
     
      È da saper in questo zorno in consejo fo posto parte per i consejeri di dar a Marco di Santi, atento li soi meriti, l'oficio di la justicia vechia per anni 4; ave 3 non sincere, 739 di no, 745 di la parte, et fu presa di tre balote etc.
     
     
      [1499 05 13]A dì 13. Mazo. In collegio. In questa matina andai come savio ai ordeni con sier Alvise Longo provedador sora l'armar a far la zercha di la nave Gradeniga, armada, et me intornai, era gran fortuna, la qual expedita fue.