Di Candia, di sier Bernardo Zustignam capitano et vice ducha, et consejeri, di 7 mazo. Prima esser zonto li biscoti di Cypro. Item, solicitavano armar le galie, tre sono armade et una si arma, zoè questi: sier Marco Grioni, sier Francesco Zen, sier Stae Bragadin et sier Tomà Dandolo. Item, haveano electo 6 altri soracomiti: sier Jacomo Barozi da la Cania, qual è l'ultimo licet qui sia notà prima, sier Carlo Zen, sier Zuam Corner da Retimo, sier Francesco Foscarini, sier Marco Salamon, sier Nicolò Barbarigo, et il Barozi. Item, esser zonto sier Battista Polani con l'arsil, et si armerà a la Cania; et etiam esser zonto sier Piero Sanudo synico, qual lo laudano molto, et farà bona opera a quella camera, et esser stà desiderà da li zentilhomeni et populo; et per bisogno dil luogo di Malvasia havia mandà di Candia 25 balestrieri lì, per consejo di ditto synico con la galia, soracomito sier Nicolò Marzelo, che menò lì el synico. Item, mandano la copia di una lettera scritta a esso capitano per il cardinal gran maestro di Rodi, per la qual dimanda alcuni formenti, è stà lì in Candia retenuti, et li à mandà uno gripo armado, et ditto capitano li havia risposto con bone parole, etc.
     
      Di sier Piero Sanudo synico in Levante, di 8 mazo date in Candia. Come havia mandato a Malvasia 25 balestrieri soto Zorzi Carturo, in la rocha, con hordine non si parti di rocha. Item, avisa quella terra è in pericolo, voria la Signoria ordinasse a quel podestà, sier Andrea da Riva, non desse audientia in rocha per esser cossa pericolosa; etiam non andasse fuora in loza a questi tempi; et aricorda staria ben lì uno castelan.