Ave niuna non sincere, 64 di no, 105 di la parte, et fu presa; et cussì iterum tutti tre, zoè Calbo, Guoro e Polani, fono iterum balotadi, et di novo cazeteno di più balote di quello feno eri.
     
      Fo messo per li consejeri, io Marin Sanudo sier Vetor Capelo et sier Zuam Moro, savii ai ordeni parte, che doman sieno reincantade le ditte tre galie di Alexandria, senza dir altro danno di patroni, have 15 di no et 131 di la parte, et fu presa.
     
      Item, fu posto, per nui tre savii ai ordeni, che le galie do di Fiandra, zoè sier Fantin Querini e sier Lorenzo Pasqualigo, tre di Baruto, sier Francesco Michiel, sier Zuam Morexini, sier Jacopo Corner, et una di Alexandria, sier Trajan Bon, quali erano zà provadi, debino domenega proxima meter banco justa il consueto, et che si debbi deliberar quello si habino a far o mandarle in armada, overo no, [795] et il collegio sia ubligato doman da matina consultar, soto pena di ducati 500 per cadaun, da esser scossi per li avogadori, et debino dir l'opinion di mandarle in armada, et sabado venir a questo consejo, et have assa' balote, e fo presa.
     
      Item, fu messo, per sier Marco Antonio Morexini el cavalier consejer, sier Ferigo Corner procurator, sier Constantin di Prioli, sier Marchio Trivisan savii dil consejo et sier Polo Pixani el cavalier savio a terra ferma, di risponder al ducha di Urbim, quasi tuorlo a provision l'anno di rispetto; et sier Filippo Trum procurator, sier Nicolò Foscarini, savii dil consejo, sier Francesco Trum, sier Alvise Venier, sier Marco Sanudo, savii a terra ferma, di risponderli che l'anno di rispeto non feva per noi; et sier Polo Barbo consejer, andò in renga, rispondendo a quello eri disse sier Marco Antonio Morexini, e fè gran discorsi, e intrò in la parte dil Trum e compagni, le qual andate, fo non sincere una, di no do, di quella dil Barbo e compagni 55, di quella dil Morexini e compagni 109, e fu presa.