Item, esso pontifice li disse haver paura di la vita. Et che sier Hironimo Donado orator tolse licentia da soa santità, et cussì marti si partirà di lì.
     
      Di sier Polo Capelo el cavalier orator, solo, di 4. Come in quel zorno esser partito il Donado orator, accompagnato da li prelati et fameje di cardinali venitiani, et lui poi tornato fue dal cardinal Ascanio, el qual li usò gran parole, à mandà una lettera andava a la Signoria nostra ringraciatoria de la expedition di certa sua cossa, la qual è di poche parole. Item, eri in concistorio fo dato l'arziepiscopado di Pisa, qual havia il cardinal San Zorzi et lo renuncioe, ad uno suo nepote fiol fo dil conte Hironimo, con condition in vita di esso cardinal li dagi la mità de l'intrada, el qual val ducati ...
     
      Da Nolla, di sier Francesco Morexini dotor orator, di 14 mazo. Come la majestà dil re havia auto lettere dil suo orator di la Valona, di 27 april: come era zonto li; et non descargato ancora, el corpo dil fratello dil Turcho che al Signor portava, di la barza dove era. Et che a dì 17 el re tornerà con li oratori a Napoli; a batizar l'infante sarà el signor Fabricio et sier Spero Colonna, el principe di Bissignano, et il ducha di Melfi.
     
      In questo pregadi fu fato election di uno patron di la barza: quelli fono tolti saranno qui sottoscritti. Rimase sier Sebastian Moro, era XL criminal q. sier Damian, et aceptoe.
     
      Et poi leto le lettere, et fato tal balotation, la Signoria si redusse con li cai dil consejo di X et li savii grandi et di terra ferma, da basso in cheba, et il pregadi rimase in gran consejo: steteno assai ad quid nescio, et poi fo mandato a licentiar el pregadi.