Da Corphù, dil rezimento, di 10 et 11. Dimandono artilarie et munition, quale era stà balotate, ma non ancora mandate; dimandano danari; avisano nove come l'armada vien a Corphù certissimo, et a danno di la Signoria nostra. Item, Scander bassà esser partido da Constantinopoli con hordine di corer su quel di Zara et Friul. Item, esser zonto l'arsil per armarlo lì, qual havea per soracomito Olivier Morelo, et lo armerà. Item, per un'altra lettera scriveno, haver ricevuto la nostra lettera di la gran provista si fa, l'hanno leta publice al populo, ringratia la Signoria, voleno armar lhoro 60 gripi, non voleno si non monition et il pan. Item, dil zonzer di la nave Pandora et Malipiera. Item, scriveno una relation di Andrea Beri, gionse lì a dì 9, venuto per terra da Constantinopoli, è zorni 16 partì da sier Andrea Griti qual non pol scriver per el pericolo, dice el bilarbei esser partito per Galipoli, et il Signor dovea partir fin 3 zorni per Andernopoli, l'armata esser preparata di velle 300, et lui havia visto 100 galie, velle quare 22, et il resto fuste et palandarie, et a Galipoli è galie 50, zoè 45 grande et 5 picole, schierazi, et palandarie per vituarie et cavalli, le qual portano cavalli 40 l'una. Item, una cadena grossa di tre mia longa, et piere di bombarda numero 14 milia, di le qual 9000 nombrate. Item, bombarde grosse numero ... et bastioni; et dice vien certo a Corom, Modom, Napoli, Lepanto o a Corphù; et ditto sier Andrea Griti lo havia spazà, pregando el baylo spazi tre gripi a la Signoria nostra; et par che lo exercito sia reduto a Galipoli pocho lontan di Chipsala.